Norin tumani hokimligi faollar zalida o‘tkazilgan yig‘ilishda tuman hududida sodir bo‘layotgan yo‘l-transport hodisalari, ularga sabab bo‘layotgan omillar hamda yo‘l harakati qoidalarini muntazam buzib kelayotgan haydovchilar faoliyati yuzasidan kengaytirilgan muhokama o‘tkazildi. 

Shu bilan birga, so‘nggi vaqtlarda Namanganda yuz bergan yo‘l-transport hodisalaridan to‘g‘ri xulosa qilish, bunday holatlarning oldini olish uchun barcha targ‘ibot va tashkiliy choralarni yana-da kuchaytirish zarurligi taʼkidlab o‘tildi.

Unda viloyat IIB rahbariyati, tuman hokimi, tuman IIB boshlig‘i, mahalla faollari, profilaktika inspektorlari ishtirok etishdi.

Yig‘ilishda tumanda aholi tomonidan yo‘l harakati qoidalariga amal qilish madaniyati, sodir etilayotgan huquqbuzarliklarning holati va oqibatlari atroflicha muhokama qilindi. 

Ayniqsa, voyaga yetmaganlar ishtirokida sodir bo‘layotgan yo‘l-transport hodisalari ko‘paygani, haydovchilar tomonidan tezlikni meʼyoridan oshirish holatlari hali ham davom etayotgani, bu borada keng qamrovli tushuntirish ishlarini kuchaytirish lozimligi alohida qayd etildi.

Har bir qoidabuzarlik misol tariqasida keltirilib, ularni bartaraf etish bo‘yicha zarur choralar belgilandi.

Yuqorida sanab o‘tilgan muammolarni bartaraf etish yuzasidan takliflar bildirilib, kelgusi vazifalar belgilab olindi.